ഏട് മാസിക . 2009 december

രചനകള്‍ മെയില്‍ ചെയ്യുക.
eadumasika@gmail.com
Showing posts with label കുറിപ്പുകള്‍. Show all posts
Showing posts with label കുറിപ്പുകള്‍. Show all posts

6/28/09

രണ്ട് കുറിപ്പുകള്‍

നടരാജന്‍ ബോണക്കാട്







വൈരുദ്ധ്യാധിഷ്ഠിത ഭൌതിക വാദം ഇറക്കുമതിച്ചരക്കാണെന്ന വാദത്തെക്കുറിച്ച്‌...



അത് ഒരിക്കലും ഇറക്കുമതി ചെയ്യപ്പെട്ടില്ല. നൂറ്റാണ്ടുകള്‍ക്കു മുമ്പ് ഈ നാടുകളെല്ലാം കാടായിരുന്ന കാലത്ത് ജീവന്‍റെ
ഓരോ പെരുമാറ്റ രീതികളിലും അത് സജീവമായി നിലനിന്നിരുന്നു. ഇപ്പോഴും കാടുകളിലും അത്രതന്നെ വിശുദ്ധമായ മനസ്സുകളിലും അതുണ്ട്.



ചൈതന്യവത്തായ ഓര്‍മ്മ



അപ്പ, അണ്ണന്‍, ഞാന്‍ പിന്നെയൊരു പശുക്കന്നും തേയില എസ്റ്റേറ്റില്‍ നിന്നും മലമ്പാതയിലൂടെ ഇരുപത്താറുമൈല്‍
ദൂരെയുള്ള ഗ്രാമത്തിലേക്ക് നടക്കുകയാണ്. ഓരങ്ങളിലെ പുല്‍ക്കാടുകളെ ചൂണ്ടി ഗ്രാമത്തില്‍ അവയുടെ ദൌര്‍ലഭ്യത്തെ
കുറിച്ച് കുട്ടികളായ ഞങ്ങളോട് അപ്പ സംസാരിച്ചു.

കാട്, ഒരു മൃഗത്തിന്‍റെ സാന്നിദ്ധ്യം, പദയാത്ര, വിദൂര ഗ്രാമത്തിന്‍റെ ആസന്നത...ഈ ഘടകങ്ങളെല്ലാം സമന്വയിക്കുന്ന ഒരു
മാനസികാന്തരീക്ഷം... ഭൂമിയുടെ ഉല്‍പത്തിയേയും പരിണാമങ്ങളെയും കുറിച്ച് ഗന്ധങ്ങള്‍ പകരുന്ന വന്യാനുഭൂതി...
ഇത് എന്നും ചൈതന്യവത്തായ ഓരോര്‍മ്മയായിരിക്കുന്നത് അതുകൊണ്ട് തന്നെ.
.......................................................................

ഏട്, 1991 മാര്‍ച്ച്

.......................................................................


6/19/09

കവിതയും കാലവും

ഡോ. ടി. പി. നാസര്‍





കവിതയെ കാലവുമായി ബന്ധപ്പെടുത്തുന്നത് എന്താണ്? കവിത ഒരേ സമയം കവിയുടെ ആത്മകഥയും കാലത്തിനു നേരെ തുറന്നുവെച്ച കണ്ണുകളുമാണ്. '' ഒരു കവിയുടെ കവിത അയാളുടെ ആത്മാവിന്‍റെ മുദ്രകളും കാലത്തിന്‍റെ മുദ്രകളും വഹിച്ചേ പറ്റൂ...'' ( സച്ചിദാനന്ദന്‍ - തെരഞ്ഞെടുത്ത കവിതകള്‍ ) എന്ന കവികളുടെ ശാഠ്യത്തില്‍ തന്നെ ഈയൊരു ധ്വനിയുണ്ട് . കാലവും കവിതയുമായുള്ള ഈ ആത്മ ബന്ധമാണ് കവിതയുടെ മൂല്യ ബോധത്തെ അപ്പപ്പോള്‍ തട്ടിയുണര്‍ത്തുന്നത്‌.

ക്രൂരവും തീഷ്ണവുമായ അനുഭവങ്ങള്‍ സമൂര്‍ത്തമായ മനുഷ്യ പ്രശ്നങ്ങളോടും സമകാലികവും രാഷ്ട്രീയവുമായ പ്രശ്നങ്ങളോടും പ്രതികരിക്കാന്‍ പ്രേരിപ്പിക്കുന്നു. ചോദ്യങ്ങളെറിയുന്തോറും നിസ്സഹായാവസ്ഥയും ദൌര്‍ബല്യങ്ങളും തിരിച്ചറിയുന്ന കവി അതിഭാവുകത്വത്തോടെ സംസാരിക്കാന്‍ തുടങ്ങുന്നു. ഉദാഹരണമായി , '' ഭീകരവും ക്രൂരവുമായ ഇത്തരം നിസ്സഹായതയില്‍ നിന്നും രക്ഷപ്പെടാനുള്ള ശ്രമത്തിന്‍റെ ഭാഗം മാത്രമാണ് തന്‍റെ കവിത... '' എന്ന് ബാലചന്ദ്രന്‍ ചുള്ളിക്കാടും , '' നഗ്ന പാദനായ് നീ പടിയിറങ്ങി പോകുമ്പോള്‍ കവി മുള്ളുതറച്ചു നില്ക്കുന്നു...'' എന്ന് എ. അയ്യപ്പനും പാടുമ്പോള്‍ തങ്ങള്‍ക്കു സംരക്ഷിക്കാനാകാത്ത, തങ്ങളില്‍നിന്നും നഷ്ടപ്പെട്ടുപോകുന്ന ആത്മ ബോധം മൂല്യച്യുതിയുടെ പ്രതിഫലനം തന്നെയെന്ന്‌ നമ്മെ ഓര്‍മ്മപ്പെടുത്തുകയാണ്. ഈ മൂല്യശോഷണത്തെ പ്രധിരോധിക്കാനുള്ള കവിയുടെ പരിചയാണ് കവിതയുടെ ശില്പം.

................................................
ഏട്, 1990 ഡിസംബര്‍ , ലക്കം 4
................................................
( ചിത്രം ഗൂഗിളില്‍ നിന്നും )
................................................

6/14/09

നിരക്ഷരമനസ്സ്

നടരാജന്‍ ബോണക്കാട്

നെഞ്ചിലെ കുരുതിച്ചോര വീണഴുകിയ ദുരിതങ്ങളുടെ ചവറ്റുകൂനയ്ക്കടിയില്‍ ഒരു മരതകക്കല്ലിനുള്ളിലെ സംഗീതം കാത്തുവെക്കപ്പെട്ടിരിക്കുന്നു. ഒരുനാളത് വാക്കുകളായി രൂപാന്തരപ്പെടും; ആ കാലം വരും.

..................................................................................................

ഏട്, 1990 ജനുവരി ലക്കം 2

നോവലും നോവലിസ്റ്റും

സി. ആര്‍. പരമേശ്വരന്‍

നോവലിന്‍റെ സമാന്തര ധാരയെക്കുറിച്ചാണല്ലോ എഴുതാന്‍ പറഞ്ഞത് ? അങ്ങനെ ഒന്നുണ്ടെങ്കില്‍ തന്നെ അത് വളരെ പ്രക്ഷീണമാണ്. അടിയുറച്ച മൂല്യബോധവും അതിനാല്‍ നിര്‍ണ്ണയിക്കപ്പെടുന്ന ദര്‍ശനവും ഉള്ള നോവലിസ്റ്റുകള്‍, മുതലാളിത്ത വ്യവസ്ഥയുടെ ഇന്നത്തെ അവസ്ഥയോട്‌ cope up ചെയ്യാനാകും വിധം സ്വയം രാഷ്ട്രീയവല്‍കരിച്ചിട്ടുള്ള നോവലിസ്റ്റുകള്‍ നമുക്കിന്ന് വളരെ കുറവാണ്. ഉള്ളത് ജീവിതത്തെക്കുറിച്ച് ഭാഗിക ദര്‍ശനമുള്ള അരാഷ്ട്രീയക്കാരും, യാന്ത്രിക മാര്‍ക്സിസത്താല്‍ കണ്ടീഷന്‍ ( condition ) ചെയ്യപ്പെട്ട കക്ഷി രാഷ്ട്രീയക്കാരുടെ ആശ്രിതരുമാണ്.

വില്‍പ്പനയ്ക്ക് മാത്രമല്ലാതെ ആത്മാവിഷ്കാരം ലകഷ്യമാക്കി എഴുതുന്നവര്‍ വളരെ കുറവാണ്. ആനന്ദ്‌ മാത്രമാണ് ഒരു അപവാദം. അതാണ്‌ കോവിലന്‍ പറഞ്ഞത് ആനന്ദ്‌ ഒഴികെ മറ്റെല്ലാവരും പൈങ്കിളി നോവലിസ്റ്റുകളാണെന്ന്.

...............................................................................................................................
സി. ആര്‍. പരമേശ്വരന്‍

(നോവലിന്‍റെ സമാന്തര ധാരയെക്കുറിച്ച് എഡിറ്റര്‍ അഭിപ്രായം ആരാഞ്ഞപ്പോള്‍ എഴുതിയ മറുപടി.)

................................................................................................................................
ഏട്, 1990 ജനുവരി ലക്കം 2