കത്തുകള്‍
1990 സെപ്റ്റംബര്‍ ലക്കത്തില്‍ വന്ന പ്രതികരണങ്ങള്‍.
സാമൂഹ്യ യാഥാര്‍ത്ഥ്യങ്ങള്‍ പ്രതീകാത്മകമായി പ്രസിദ്ധീകരിച്ചതിന് പാത മാസികയുടെ പത്രാധിപരായ നടരാജന്‍ ബോണക്കാടിനെ പോലീസ്‌ അറസ്റ്റുചെയ്യുകയും മര്‍ദ്ദിക്കുകയും ചെയ്തിരിക്കുന്നു. 24 മണിക്കൂര്‍ കസ്റ്റഡിയില്‍ വെച്ചാല്‍ കോടതിയില്‍ ഹാജരാക്കണമെന്ന നിയമം ലംഘിച്ച് മൂന്നുദിവസം ലോക്കപ്പില്‍ പാര്‍പ്പിക്കുകയും അപമര്യാദയായി പെരുമാറുകയും ഉണ്ടായി. ഇത് ഇന്നത്തെ ജനാധിപത്യ മര്യാദകള്‍ക്ക് വിരുദ്ധവും നിലവിലുള്ള പൌരാവകാശങ്ങള്‍ക്കു നേരെയുള്ള കത്തിവെക്കലുമാണ്. ഈ സംഭവത്തില്‍ കേരളത്തിലെ മിനി - ഇന്‍ലാന്‍റ് മാസികകളോടൊപ്പം ഏടും പ്രതികരിക്കുക.
- എം. ബി. ഷൈജു, നെടുമങ്ങാട്.
ജീവിത സത്യങ്ങളെ വെറും ക്യാപ്സൂളുകളില്‍ ഒതുക്കുന്ന ലിറ്റില്‍ സാഹിത്യ രീതിക്ക് അടിമപ്പെട്ടുപോകരുത്. സാഹിത്യ സംസാരങ്ങളില്‍ ലിറ്റില്‍ സാഹിത്യവും ഇന്‍സ്റ്റോള്‍മെന്‍റ് സാഹിത്യവുമൊക്കെ പരിഹാസ്യമാക്കപ്പെട്ടു തുടങ്ങിയിരിക്കുന്നു.
- ബാബുരാജ്‌. കെ. ടി. കണ്ണൂര്‍
ഇപ്പോഴൊരു വാര്‍ത്ത അറിയാനായി. നെടുമങ്ങാട്ടുനിന്നും പ്രസിദ്ധീകരിക്കുന്ന പാത മാസികയുടെ പിറന്നാള്‍ പതിപ്പില്‍ '' ഞങ്ങളുടെ കോളനിയിലെ സുന്ദരികളുടെ കഥ '' എന്ന ലേഖനം എഴുതിയതിനെ ചൊല്ലി പത്രാധിപരെ നിയമപാലകര്‍ നിയമ വിരുദ്ധമായി കസ്റ്റഡിയില്‍ വെക്കുകയും പീഢിപ്പിക്കുകയും ചെയ്തു. ലിറ്റില്‍ മാഗസിന്‍ ചരിത്രത്തില്‍ തന്നെ ആദ്യ സംഭവമായേക്കാം ഇത്. വിധ്വംസനങ്ങള്‍ക്കെതിരെ എങ്ങിനെയാകും പ്രതികരിക്കാനാവുക?
- മിനി, ചിറയിന്‍കീഴ്‌
പ്രഭാവതിയുടെ വാങ്മയവും ഗിരീഷിന്‍റെ ശാന്തമെന്നു പറഞ്ഞ കാക്കയും രണ്ടാം ലക്കത്തെ സമ്പുഷ്ടമാക്കി.
- കുരീപ്പുഴ ശ്രീകുമാര്‍
മലയാള സാഹിത്യം വലിയൊരു സ്തംഭനാവസ്ഥയിലാണ്. അതിനെ ദൂരീകരിക്കാന്‍ കഴിയുന്ന സാംസ്കാരിക പ്രവര്‍ത്തനങ്ങള്‍ക്കെ ഇന്ന് പ്രസക്തിയുള്ളൂ. ഒരു ഇന്‍ലാന്‍റ് മാസികയായാലും ഇത്തരമൊരു ലക്‌ഷ്യം മുന്നില്‍ കണ്ടുകൊണ്ട് പ്രവര്‍ത്തിക്കണം. ഏടില്‍ എഴുതുന്നവര്‍ പുതിയ തലമുറയില്‍ ഉള്ളവരാണല്ലോ? മുതിര്‍ന്ന തലമുറയെ അവരുടെ അലസതയില്‍ നിന്നും ഞെട്ടിപ്പിക്കാനുതകുന്ന രചനകള്‍ക്ക്‌ വേണ്ടിയാകണം ഏട്.
- സി. ആര്‍. പരമേശ്വരന്‍
ഏടിന് വേണ്ടി എഴുതിയിരുന്നല്ലോ? വളരെ ചെറിയ കഥയെഴുതാനുള്ള പ്രയാസം കൊണ്ടാണ് അയക്കാത്തത്. വിചാരിച്ചുവെങ്കിലും അത്തരമൊന്ന് രൂപപ്പെടുത്താനായില്ല. വൈകാതെ കഴിയുമെന്ന് കരുതുന്നു.
- അശോകന്‍ ചരുവില്‍
.....................................................
Not able to read this blog, please install malayalam font from following link
കത്തുകള്‍
ReplyDelete